steel-bridge
ಉಕ್ಕಿನ ಸೇತುವೆಯ ಪರ ಹಾಗೂ ವಿರೋಧದ ಧ್ವನಿಗಳು ದಿನದಿಂದ ದಿನಕ್ಕೆ ಹೆಚ್ಚಿನ ಪ್ರಮಾಣದಲ್ಲಿ ಕೇಳಿಬರುತ್ತಿವೆ. ಬೆಂಗಳೂರಿನಲ್ಲಿ ಬಸವೇಶ್ವರ ವೃತ್ತದಿಂದ ಹೆಬ್ಬಾಳ ಮೇಲ್ಸೇತುವೆಯವರೆಗೆ ನಿಜಕ್ಕೂ ಉಕ್ಕಿನ ಸೇತುವೆಯ ಅವಶ್ಯಕತೆಯಿದೆಯೇ ಎನ್ನುವುದನ್ನು ವಿವಿಧ ಸ್ಥರಗಳಲ್ಲಿ ಯೋಚಿಸಿದಾಗ ‘ಬೇಕು’ ಎನ್ನುವ ಉತ್ತರವೇ ಹೆಚ್ಚು ಆಪ್ತವೆನಿಸುತ್ತದೆ, ಸೇತುವೆ ಬೇಕಾಗಿದೆ ಕೂಡ.
   ‘ಉಕ್ಕಿನ ಸೇತುವೆ ನಿರ್ಮಾಣ ಯಾಕೆ ಮಾಡಬೇಕು?’ ಎನ್ನುವ ಪ್ರಶ್ನೆಗೆ ಹಲವು ಸಶಕ್ತ ಕಾರಣಗಳು ದೊರೆಯುತ್ತವೆ. ಬೆಂಗಳೂರು ಕೇವಲ ದೇಶಮಟ್ಟದಲ್ಲಿ ಮಾತ್ರವಲ್ಲ, ಜಾಗತಿಕ ಮಟ್ಟದಲ್ಲಿ ಹೆಸರು ಮಾಡಿರುವ ಮಹಾನಗರಿ. ಹಲವಾರು ಉದ್ದಿಮೆಗಳಿಗೆ ಇದು ನೆಚ್ಚಿನ ತಾಣ. ಉದ್ದಿಮೆಗಳು, ಕೈಗಾರಿಕೆಗಳು ಹೆಚ್ಚಿದಂತೆ ಜನಸಂಖ್ಯೆಯೂ-ವಾಹನಗಳೂ ಹೆಚ್ಚುತ್ತಿವೆ. ಬೆಂಗಳೂರಿನ ವಿಮಾನ ನಿಲ್ದಾಣದಿಂದ ನಗರದೊಳಕ್ಕೆ ಆಗಮಿಸಲು ಹಾಗೂ ವಿಮಾನನಿಲ್ದಾಣದ ರಸ್ತೆಯಲ್ಲಿ ಸಂಚರಿಸಲು ಅದೆಷ್ಟು ಪಡಿಪಾಟಲು ಪಡಬೇಕು ಎನ್ನುವುದು ಬೆಂಗಳೂರಿಗರಿಗೆ ಅರ್ಥವಾಗಿದೆ. ಸಮಯ ಉಳಿತಾಯ ಮಾಡಲು, ಸಮಯ ನಷ್ಟದಿಂದಾಗಿ ಉಂಟಾಗುವ ಆರ್ಥಿಕ ಹೊಡೆತ ತಡೆಗಟ್ಟಲು, ಸಿಗ್ನಲ್‍ಮುಕ್ತ ಸಂಚಾರ ಏರ್ಪಡಲು, ಸುಗಮ ಸಂಚಾರಕ್ಕಾಗಿ ಹೀಗೆ ಹಲವು ಪ್ರಮುಖ ಕಾರಣಗಳನ್ನು ಪಟ್ಟಿ ಮಾಡಿದರೆ ಉಕ್ಕಿನ ಸೇತುವೆ ಇವಕ್ಕೆಲ್ಲ ಅತ್ಯುತ್ತಮ ಹಾಗೂ ಸಮಯೋಚಿತ ಪರಿಹಾರ ಎನ್ನುವುದು ಸ್ಪಷ್ಟವಾಗುತ್ತದೆ.
   ಇನ್ನು ಉಕ್ಕಿನ ಸೇತುವೆ ವಿರೋಧಿಸಲು ಕೊಡುತ್ತಿರುವ ಕಾರಣಗಳು ಸೀಮಿತ ಪರಿಧಿಯೊಳಗೆ ಚಿಂತಿಸಿದಂತವುಗಳು ಹಾಗೂ ಅದಕ್ಕೆ ಪರಿಹಾರ ಸೂಚಿಸಿದ್ದಾಗಲೂ ಕೂಡ, ಯಾವುದೋ ಪೂರ್ವಾಗ್ರಹಕ್ಕೆ ನೆಚ್ಚಿಕೊಂಡು ಹುಟ್ಟಿಕೊಂಡಂತವುಗಳು ಎನಿಸುತ್ತವೆ. ವಿರೋಧಿಸಲು ಪ್ರಮುಖವಾಗಿ ಮುಂದಿಡಲಾಗುತ್ತಿರುವ ಕಾರಣ “ಮರಗಳನ್ನು ಕಡಿಯಲಾಗುತ್ತದೆ”. ಆದರೆ ಮರಗಳನ್ನು ಸ್ಥಳಾಂತರಿಸಿ ಸೂಕ್ತ ವ್ಯವಸ್ಥೆ ಮಾಡುವುದಲ್ಲದೇ, ಪರ್ಯಾಯವಾಗಿ 60 ಸಾವಿರಕ್ಕೂ ಹೆಚ್ಚಿನ ಸಸಿ ನೆಡಲು ಮುಂದಾಗಿರುವುದು ವಿರೋಧಿಗಳ ಮನಸ್ಸಿಗೆ ನಾಟುತ್ತಿಲ್ಲ. “ಪಾರಂಪರಿಕ ಕಟ್ಟಡಗಳನ್ನು ಉರುಳಿಸಲಾಗುತ್ತದೆ” ಎನ್ನುವ ಮತ್ತೊಂದು ತಪ್ಪುಕಲ್ಪನೆಯನ್ನು ಜನರಲ್ಲಿ ಮೂಡಿಸಲಾಗುತ್ತಿದೆ. ಆದರೆ, ಪಾರಂಪರಿಕ ಕಟ್ಟಡಗಳಿಗೆ ಯಾವುದೇ ರೀತಿಯ ತೊಂದರೆ ಆಗುವುದಿಲ್ಲ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಇಷ್ಟೇ ಅಲ್ಲದೇ, ಯಾವುದೇ ರೀತಿಯ ತಪ್ಪು ಮಾಹಿತಿ ಅಥವಾ ತಪ್ಪು ಕಲ್ಪನೆಗೆ ಸಮಂಜಸ ಉತ್ತರಗಳನ್ನು ನೀಡಲಾಗಿದೆ. ಇಷ್ಟೆಲ್ಲ ಆಗಿದ್ದರೂ ಸಹ, ಸಾರ್ವಜನಿಕರ ದಿಕ್ಕು ತಪ್ಪಿಸಿ ಉಕ್ಕಿನ ಸೇತುವೆ ಬೇಡ ಎನ್ನುವ ಕೂಗನ್ನೆಬ್ಬಿಸಲಾಗುತ್ತಿದೆ.
   ಇತ್ತೀಚೆಗೆ ಬೆಂಗಳೂರಿನ ಶಾಲೆಯೊಂದರಲ್ಲಿ ಮಕ್ಕಳಿಗೆ ನೀಡಲಾಗಿದ್ದ ಸೂಚನೆಯೇನೆಂದರೆ, “ನಾಳೆ ನೀವು ಬರುವಾಗ ನಿಮ್ಮ ಅಪ್ಪ-ಅಮ್ಮನ ಹತ್ತಿರ ‘ಸ್ಟೀಲ್ ಬ್ರಿಡ್ಜ್ ಬೇಡ’ ಎಂದು ಬರೆಸಿಕೊಂಡು, ಹೆಸರು-ದೂರವಾಣಿ ಸಂಖ್ಯೆ ಬರೆಸಿಕೊಂಡು ಬರಬೇಕು”! ಶಿಕ್ಷಕರ ಮಾತಿಗೆ ಕಟ್ಟುಬಿದ್ದ ಮಕ್ಕಳು ಮನೆಗೆ ಬಂದು ಅಪ್ಪ-ಅಮ್ಮನ ಬಳಿ ಹಠಕ್ಕೆ ಬಿದ್ದು ‘ಉಕ್ಕಿನ ಸೇತುವೆ ಬೇಡ’ ಎಂದು ಬರೆಸಿಕೊಂಡವು. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ಜಿದ್ದಿಗೆ ಬಿದ್ದು, ಅಡ್ಡ ದಾರಿಯ ಮೂಲಕ, ಒತ್ತಡ ಹೇರಿ ಜನರಿಂದ ಉಕ್ಕಿನ ಸೇತುವೆ ಬೇಡ ಎಂದು ಬರೆಸಿಕೊಳ್ಳಲಾಗುತ್ತಿದೆ. ಬೆಂಗಳೂರಿಗರನ್ನು ಮಾತನಾಡಿಸಿ, ವಾಸ್ತವವನ್ನು ತಿಳಿಸಿ ಉಕ್ಕಿನ ಸೇತುವೆ ಬಗ್ಗೆ ಅಭಿಪ್ರಾಯಗಳನ್ನು ಕೇಳಿದಾಗ ಅವರು ನೀಡುವ ಉತ್ತರ “ಉಕ್ಕಿನ ಸೇತುವೆ ಬೇಕು”!
   ಹೌದು, ಬೆಂಗಳೂರಿಗೆ ಉಕ್ಕಿನ ಸೇತುವೆ ಬೇಕು. ಇದು ನಮ್ಮ ನಿಲುವು, ನಿಮ್ಮದು?
Advertisements