maxresdefault

ಟ್ರೇಲರ್ ಮೂಲಕವೇ ನಿರೀಕ್ಷೆ ಹುಟ್ಟುಹಾಕಿದ್ದ ಚಿತ್ರ ನಾನಿ. ಹಾರರ್ ಚಿತ್ರಗಳ ಸಾಲುಸಾಲು ಬಿಡುಗಡೆಯ ನಡುವೆಯೂ ಭರವಸೆ ಮೂಡಿಸಿದ್ದ ಚಿತ್ರದ ಟ್ರೇಲರ್ ನೋಡಿ ಚಿತ್ರಮಂದಿರಕ್ಕೆ ತೆರಳಿದವರಿಗೆ ನಿರಾಸೆಯಂತೂ ಆಗದು. ಸಂಪೂರ್ಣ ಭೂತಮಯಂ ಎಂಬಂತೆ ಚಿತ್ರವಿಲ್ಲದೇ ಇರುವುದು, ಭಾವನಾತ್ಮಕ ಅಂಶಗಳಿಗೆ ಒತ್ತು ನೀಡಿರುವುದು ‘ನಾನಿ’ಯನ್ನು ಒಂದು ಕೌಟುಂಬಿಕ ಚಿತ್ರವನ್ನಾಗಿಸಿದೆ.

   ಸಮರ್ಥ್ (ಮನೀಷ್) ಹಾಗೂ ಪತ್ನಿ ಮಂತ್ರ (ಪ್ರಿಯಾಂಕಾ) ಹೊಸದಾಗಿ ಮನೆಯೊಂದನ್ನು ಕೊಂಡುಕೊಳ್ಳುತ್ತಾರೆ. ಆ ಮನೆಯ ಬಗ್ಗೆ ಭಾವನಾತ್ಮಕ ನಂಟು ಹೊಂದಿರುವ ಸಮರ್ಥ್‍ಗೆ ಆ ಮನೆಯ ಭಯಾನಕ ಮುಖದ ಪರಿಚಯ ಇರುವುದಿಲ್ಲ. ತನ್ನ ಹಿರಿಯರು ಬಾಳಿ ಬದುಕಿದ ಮನೆ ಎನ್ನುವ ಭಾವನಾತ್ಮಕ ನಂಟಿನೊಂದಿಗೆ ಸಮರ್ಥ್ ತನ್ನ ಪತ್ನಿಯೊಂದಿಗೆ ಮನೆ ಪ್ರವೇಶಿಸುತ್ತಾನೆ. ಆಮೇಲೆ ಅಲ್ಲಿ ನಡೆಯುವ ಭಯಾನಕ ವಿಷಂiÀiಗಳು ದಂಪತಿಗಳನ್ನು ಹೈರಾಣಾಗಿಸುತ್ತದೆ. ಅಲ್ಲಿಗೆ ಮಂತ್ರವಾದಿಯ ಪ್ರವೇಶವಾಗುತ್ತದೆ ಹಾಗೂ ಮಂತ್ರವಾದಿಯ ಭೀಕರತೆಗೆ ಹೆದರಿ ಮನೆಯ ಕಾವಲುಗಾರ ಈ ಎಲ್ಲ ಭಯಾನಕತೆಯ ಹಿಂದಿನ ಸತ್ಯವನ್ನು ಬಿಚ್ಚಿಡುತ್ತಾನೆ.

   ಇಲ್ಲಿಂದ ಕಥೆ ಮತ್ತೊಂದು ಮಗ್ಗುಲಿಗೆ ಹೊರಳುತ್ತದೆ. ಅಲ್ಲಿ ಜೈಜಗದೀಶ್ ಹಾಗೂ ಸುಹಾಸಿನಿ ಜೋಡಿಯ ಅದ್ಭುತ ನಟನೆ ಪ್ರೇಕ್ಷಕನಿಗೆದುರಾಗುತ್ತದೆ. ಮಕ್ಕಳಿಲ್ಲದ ದಂಪತಿ, ಮಕ್ಕಳನ್ನು ಪಡೆಯಲು ಮಾಡುವ ಉಪಾಯ, ಪ್ರಣಾಳ ಶಿಶುವನ್ನು ಪಡೆದಾದ ಮೇಲೆ ತಂದೆಗೆ ಈ ಮಗು ತನ್ನದಲ್ಲ ಎನ್ನುವ ಭಾವನೆ ಮೂಡಿ ಮಗುವನ್ನು ನಿರ್ಲಕ್ಷಿಸುವುದು ಹೀಗೆ ಕಥೆ ಸಾಗುತ್ತದೆ. ತಂದೆಯ ಪ್ರೀತಿಯಿಂದ ವಂಚಿತವಾದ ಮಗುವಾಗಿ ಅಭಿನಯ ನೀಡಿರುವ ಬೇಬಿ ಸುಹಾಸಿನಿ ತನ್ನ ಮುಗ್ಧತೆಯಿಂದಲೇ ಪ್ರೇಕ್ಷಕರಿಗೆ ಇಷ್ಟವಾಗುತ್ತಾಳೆ. ಮುಂದೆ ಆಕೆಯೇ ಭೂತವಾಗುತ್ತಾಳೆ!

   ಇನ್ನು ಅಭಿನಯಕ್ಕೆ ಬಂದರೆ ಮನೀಷ್ ಕಂಠಪಾಠ ಒಪ್ಪಿಸುವ ವಿಧೇಯ ವಿದ್ಯಾರ್ಥಿಯಂತೆ ಭಾಸವಾಗುತ್ತಾರೆ. ಪ್ರಿಯಾಂಕಾ ನಟನೆಯಲ್ಲಿ ಭರವಸೆ ಮೂಡಿಸುತ್ತಾಳೆ. ನಿರ್ದೇಶಕ ಸುಮಂತ್ ಗೊಲ್ಲಹಳ್ಳಿ ಒಂದರ್ಥದಲ್ಲಿ ಗೆದ್ದಿದ್ದಾರೆ ಎಂದೇ ಹೇಳಬಹುದು. ಇರುವ ನಾಲ್ಕು ಹಾಡುಗಳು ಆ ಕ್ಷಣಕ್ಕೆ ಚೆನ್ನಾಗಿವೆ. ಹಿನ್ನೆಲೆ ಸಂಗೀತ ಚೆನ್ನಾಗಿದ್ದರೂ, ಕೆಲವೆಡೆ ದೆವ್ವವೂ ಕಿವಿಮುಚ್ಚಿ ಓಡಿಹೋಗುವಂತಿದೆ. ಗುಂಡ್ಲುಪೇಟೆ ಸುರೇಶ ಛಾಯಾಗ್ರಹಣದಲ್ಲಿ ಚಿತ್ರವನ್ನು ಚೆನ್ನಾಗಿ ಕಟ್ಟಿಕೊಟ್ಟಿದ್ದಾರೆ. ಒಟ್ಟಿನಲ್ಲಿ ಪ್ರೇಕ್ಷಕರು ಒಮ್ಮೆ ನೋಡಬೇಕಾದ ಚಿತ್ರವಿದು. ಹೆದರಿಕೆಯ ಜೊತೆಗೆ ಕಣ್ಣೀರಿಗೂ ಜಾಗವಿದೆ. ಹಾಗೆ ಸುಮ್ಮನೆ ಒಮ್ಮೆ ಹೆದರಿ ಬನ್ನಿ.

Advertisements